"Кыргызалтындын" башчысы Кубат Абдраимов Кумтөр кен жайындагы өндүрүштүк процесстерди инспекциялады

"Кыргызалтын" ачык акционердик коомунун башкармалыгынын төрагасы Кубат Абдраимов Кумтөр кен жайындагы долбоорлордун ишке ашырылышын жана өндүрүш процесстерин инспекциялады.

Анын алкагында "Кыргызалтындын" башчысы Кумтөр кен жайынын Борбордук жана Сары-Төр карьерлеринин, алтын ылгоочу фабриканын, май куюучу комплекстин жана оор техникаларды оңдоочу жайдын иши менен таанышты.

Кубат Абдраимов "Кумтөр Голд Компани" үчүн ушул жылга белгиленген алтын өндүрүү планын так аткаруу тапшырмасын койду.  Ошондой эле ал оор тоо-кен техникаларын оңдоочу жайдын жана май куюучу комплекстин ишине өзгөчө көңүл бурду.

"Азыр кен жайда эң заманбап атайын тоо-кен жана көмөкчү техникалар иштейт. Техника бийик тоо шартында, көбүнчө катаал аба ырайында тынымсыз иштегендиктен, ар кандай бузулуулар сөзсүз болот. Мында көп нерсе оңдоочу усталардын кесипкөйлүгүнөн көз каранды, алардын жогорку чеберчилигинен албетте эч ким шектенбейт. Күйүүчү май куюучу комплекске келсек, анын ишке киргизилиши дизель отунун колдонууну көзөмөлдөөнү күчөтүүгө жана олуттуу каржылык ресурстарды үнөмдөөгө мүмкүндүк бергенин белгилегим келет. Биз мындай жетишкендиктер менен токтоп калбашыбыз керек. Бул багыттагы ишти дайыма өркүндөтүп, санариптештирүү элементтерин активдүү илгерилетебиз", – деп белгиледи ал.