«Кыргызалтын» ААКнын Башкармалыгынын Төрагасы Кубат Абдраимов «Макмал Голд Компани» филиалынын өндүрүш иштеринин жүрүшү менен таанышты.

«Кыргызалтын» ААКнын Башкармалыгынын Төрагасы Кубат Абдраимов Жалал-Абад облусунда жайгашкан «Макмал Голд Компани» ЖЧКсынын филиалына жумушчу сапар менен барды.

Сапардын жүрүшүндө компания жетекчиси ишкананын учурдагы өндүрүштүк ишмердүүлүгү, коюлган тапшырмалардын аткарылышы менен кеңири таанышып, ошондой эле комбинаттын негизги объектилерин кыдырып, алардын учурдагы техникалык абалына жана жүргүзүлүп жаткан иштерге баа берди.

Ишкананын эмгек жамааты менен жолугушууга өзгөчө көңүл бурулду. Ачык диалогдун алкагында кызматкерлер комбинаттын өндүрүштүк ишмердүүлүгүнө, эмгек шарттарына, социалдык камсыздоого жана эмгек акынын деңгээлине байланыштуу кызыктырган суроолорун бере алышты. Кубат Абдраимов бардык актуалдуу маселелер боюнча кеңири түшүндүрмө берип, жетекчилик менен жамааттын ортосунда туруктуу өз ара байланыштын маанилүүлүгүн белгиледи.

Жумушчу сапардын алкагында экологиялык иш-чаралар да өткөрүлдү. Аймакты жашылдандыруу жана айлана-чөйрөнү сактоо максатында көчөт отургузуу акциясы уюштурулуп, ага Тогуз-Торо районунун Казарман айылынын жергиликтүү активинин өкүлдөрү жана аксакалдары катышты.

Мындай демилгелер экологиялык маданиятты бекемдөөгө жана келечек муундар үчүн ыңгайлуу чөйрө түзүүгө багытталган.
Сапардын жыйынтыгында «Кыргызалтын» ААКнын жетекчиси «Макмал Голд Компани» ЖЧКсынын жетекчилигине бир катар артыкчылыктуу тапшырмаларды белгиледи.

Атап айтканда, жабдууларды модернизациялоо иштерин тездетүү, оңдоо иштерин өз убагында аяктоо, ошондой эле ишкананын айланасындагы аймакты көрктөндүрүү жана тартипке келтирүү боюнча чараларды күчөтүү тапшырылды