Кичи-Кемин айыл өкмөтүнүн жергиликтүү тургундары Мироновское кенин иштетүүгө колдоо көрсөтүштү
«Кыргызалтын» ААКы Кичи-Кемин айыл өкмөтүндө жергиликтүү тургундар менен жолугушуу өткөрүп, Кара-Булак айылына жакын жайгашкан Мироновское кенин иштетүү планын талкуулады.
Жолугушуунун жүрүшүндө «Кыргызалтын» ААК тоо кен ишканасынын өкүлдөрү бул кен тууралуу кеңири маалымат берип, пландалган иштетүү ыкмалары, айлана-чөйрөнү коргоо чаралары, ошондой эле бул долбоорду ишке ашыруунун жергиликтүү коомчулуктун өнүгүүсү үчүн пайдасы тууралуу айтып беришти.
Бул долбоорду ишке киргизүүдө жергиликтүү өз алдынча башкаруу органдарынын бюджетине салыктар, аймакты өнүктүрүү үчүн социалдык төлөмдөр жана 100дөн ашык жергиликтүү тургундар арасында жумуш орундары түзүлүшү күтүлүүдө.
Ошол эле учурда тургундардын бардык суроолоруна компаниянын компетенттүү адистери тарабынан толук маалымат берилди.
Жыйындын жыйынтыгында Кичи-Кемин айыл өкмөтүнүн активи Мироновское кениндеги кен байлыктарын иштетүү жана казып алуу долбоорун ишке ашырууну колдоорун билдиришти.
