«Кыргызалтын» ААКнын башкармалыгынын төрагасы Кубат Абдраимов өлкөнүн түштүгүндөгү бир катар кендерди текшерди

«Кыргызалтын» ААК башкармалыгынын төрагасы Кубат Абдраимов Баткен районундагы Чакуш жана Ош облусундагы Каракала-Терек кендериндеги геологиялык чалгындоо иштеринин жүрүшүн текшерди.

Учурда Баткен районундагы Чакуш участкасында компания өз алдынча жер кыртышынын геологиялык түзүлүшүн жана курамын изилдөө, ошондой эле пайдалуу кендерди издөө жана андан ары иштетүү үчүн баалуу металл ресурстарын баалоо боюнча бир катар иш-чараларды жүргүзүүдө.

Ошону менен бирге «Кыргызалтын» ААКнын жетекчилиги Ош облусундагы Каракала-Терек тилкесиндеги иштердин жүрүшү менен таанышты. Аталган кенди геологиялык чалгындоо иштеринин мындан аркы пландары жана технологиялык жолду реконструкциялоо маселелери талкууланды. Учурда Каракала-Терек тилкесинде жолду калыбына келтирүү иштери жүрүп жатат.

Жумуш сапардын жыйынтыгында Кубат Абдраимов «Кыргызалтын» ААКтын туунду компаниялардын  жетекчилерине белгиленген долбоорлорду ишке ашыруу боюнча, сапаттуу жана өз убагында аткарууга бир катар маанилүү тапшырмаларды берди.

Белгилей кетсек, «Кыргызалтын» ААКсы өлкөнүн түштүгүндө жайгашкан эки кенди чалгындоо жана иштетүүгө лицензия алган. Каракала-Терек кенди Ош облусунун Алай районунда, Чакуш кени Баткен облусунун Баткен районунда жайгашкан.