«Кумтор Голд Компани» ЖАКтын 2025-жылдагы кирешеси 1,434 млрд АКШ долларын түздү

«Кыргызалтын» ААК «Кумтор Голд Компани» ЖАКтын 2025-жылдагы ишмердүүлүгү боюнча отчетун карап чыкты.

«Кумтор Голд Компани» ЖАКтын Башкармалыгынын Төрагасы Бузурман Субанов билдиргендей, отчеттук мезгилде Кумтор кенинде 12 081 кг алтын өндүрүлгөн.

Компаниянын 2025-жылдагы кирешеси 1 млрд 434 млн АКШ долларын түзүп, таза пайдасы 706 млн АКШ долларынан ашкан. Бюджетке салыктар жана башка төлөмдөр түрүндө 246,5 млн АКШ доллары которулду, ошондой эле 300 млн АКШ доллары өлчөмүндө дивиденд төлөө жөнүндө чечим кабыл алынды.

Акционерлердин жылдык жалпы жыйынында «Кыргызалтын» ААКтын Башкармалыгынын Төрагасы Кубат Абдраимов калдыктар сактоочу жайдагы калдыктарды кайра иштетүү долбоорун ишке ашырууга кылдат даярдануу зарылдыгын белгиледи.

Анын айтымында, долбоордун негизги максаты курамында 121 тоннадан ашык алтын камтылган калдыктарды кайра иштетүү аркылуу экологиялык абалды жакшыртуу. Ошондой эле жер алдынан казып алуу долбооруна жана Тоголок кенин өздөштүрүүгө өзгөчө көңүл буруу зарыл.

Тоголок кенинде биринчи руда ушул жылы эле казылып башталары күтүлүүдө, ал эми биринчи доре-күлмө кийинки жылы өндүрүлөт. Бардык долбоорлор белгиленген мөөнөттөрдө жана кечигүүсүз ишке ашырылышы керек.

Жыйындын жүрүшүндө Кубат Абдраимов Кумтор кенинде өнөр жай коопсуздугун камсыз кылууга жана кадрдык потенциалды өнүктүрүүгө өзгөчө көңүл буруу зарылдыгын да белгиледи. Атап айтканда, көзөмөл чараларын күчөтүү, кызматкерлерди кошумча окутуу, квалификациясын жогорулатуу жана түзүмдүк бөлүмдөрдүн ишин системалуу текшерүү талап кылынат.

Жыйынтыгында, «Кумтор Голд Компани» ЖАКтын 2025-жылдагы ишмердүүлүгү боюнча отчет бекитилди.